Қауіпсіздік – жеке адамның, қоғамның, мемлекеттің өмірлік маңызды мүдделерінің ішкі және сыртқы қатерден қорғалуы. Қауіпсіздіктің негізгі нысаны – жеке адам. Әдетте біз қауіпсіздіктің қарапайым қағидаларын сақтауды салғырттық пен селқостықтан естен шығарып аламыз. Соның салдарынан жазатайым жағдайлар, оқыс оқиғалар орын алып жатады. Сондықтан қауіпсіздік ережелері мен сақтық шараларын әрдайым назарда ұстап, үнемі сақтау адам өмірі үшін аса маңызды. Әуелі өзіңіз үшін, содан кейін айналаңыздағылар үшін қауіпсіздік міндетті түрде сақталуға тиіс. Әйтпесе оның соңы орны толмас өкінішке әкеліп соқтырады.

Колледждегі қауіпсіздік ережелері

— Үзілісте баспалдақтармен жүгіруге, терезе жанында және шыны витрина немесе тағы да басқа жерлерде бір-бірін итеруге, қуалауға, заттарды лақтыруға болмайды;

— Асханада ыстық және сұйық тамақ алып жатқан кезде жан-жағына назар аударып, абай болу керек;

— Мұғалімнің рұқсатынсыз құрал-жабдықтарды орнынан қозғауға, сымдарға, розеткаларға, тиісуге тыйым салынады;

— Мұғалімнің рұқсатынсыз кабинетке кіруге және кабинеттен шығуға болмайды;

— Мұғалімнің рұқсатынсыз кабинетте жүруге болмайды;

— ДК-де су киіммен және су қолмен жұмыс істеуге болмайды;

— Корпусы мен сымдарының бүтіндігі бұзылған (ашық) ДК-де жұмыс істеуге тыйым салынады;

— Үстелге, ДК-дің жанына сумка, портфель, кітап қоюға болмайды. Үстелде тек дәптер мен қалам ғана жатуы керек;

— Пернетақтаның үстіне ештеңені қоюға болмайды;

— Компьютер кабинетінде жүгіруге, ойнауға, жолдастарыңның көңілін қажетсіз аударуға, бөгде жұмыстарды істеуге тыйым салынады;

— ДК-де жұмыс істеу барысында ақауларын байқағанда, түтін немесе әдеттен тыс дыбыстар пайда болғанда жұмысты тоқтатып, аппаратураны өшіру және оқытушыға хабарлау керек.

Аталған ережелер әр студентке мектептен таныс. Сондықтан терроризмге қарсы қауіпсіздік туралы айтып кеткім келеді: терроризмге қарсы қауіпсіздікті қамтамасыз ету мақсатында колледж аумағына және ғимаратына бөгде адамдарды жібермеу үшін іс-шаралар жүргізіледі. Колледж қызметкерлері мен білім алушылар колледжге кіру үшін колледж студенттері мен қызметкерлері «Alaqan» жүйесі арқылы кіреді.

Студенттер мен қызметкерлер  колледжге алақанды сканерлеу арқылы кіріп-шығады. Алақаны туралы биометриялық ақпарат базаға енгізілген, арнайы тіркеуден өткеннен кейін, студенттер құрылғыға алақанын көрсетсе, жабық тұрған турникет ашылады. Турникет әр студенттің алақаны мен тамыр суретін таниды. «Alaqan» колледжге бейтаныс тұлғалардың кірмеуіне және қауіпсіздік үшін маңызды. Оқытушылардың да жұмысқа келу және кету уақыты осы алақанды сканерлеу арқылы анықталып, оны колледж әкімшілігі көріп отырады. Ата-ана «Alaqan» қосымшасын телефонына жүктеу арқылы баласының колледжге сағат нешеде кіргенін, нешеде шыққанын бақылап, көре алады.

А.Кобенов,

Еңбекті қорғау және техника қауіпсіздігі, төтенше жағдайлар және азаматтық қорғаныс жөніндегі инженер